Kgaka ya hwa, Mae a bola!!

By: Lerato Mampa

Seemo seo Mmolayeng Mokwena wa mengwaga ye masometharo-seswai le mogolwage Thebong Betty Mokwena wa mengwaga ye masomehlano šupa ba phelago ka gare ga sona se swiswatša pelo. Bona ba dula motseng wa Leboeng ka ntlenyana ga Toropo ya Burgersfort.

Mmolayeng le Betty ke batho bao ba hlokago ditulothethi (wheelchairs) ka bobedi bja bona ka ge ba sa kgone go sepela. Go ya ka Mmolayeng ba belegwe ka bogolofadi bja go se kgone go sepela. Ge e le ngwako o ba dulago ka gare ga ona o tloga o rothiša le pelo ya moloi madi. O tšwetše pele ka gore seemo sa bona se ile sa thatafa le go ya pele ka morago ga gore ba šie ke batswadi mengwaga e tshela ya go feta. ka ge e be e le bona ba bego ba ba hlokometše. Ga bjale ba iphediša ka tšhelete ya mphiwafela ya bogolofadi mola ka go le lengwe e se ya lekanela ka lebaka la gore dijo le tše dingwe tša bophelo dia bitša.

Betty o re o duma ge ba ka kopana le mokhanselara wa bona wa ward 26, motsaneng wa Nkoana, O re mohlomongwe seemo sa bona setla fetoga le bona ba swana le batho ba bangwe.

Bao ba nyakago go thuša ba ka letšetša nomoro ye ya mogala 066 504 2583.

Ba kgopela go motho mang goba mang yo a ka kgonago gore a ba thuše ka ditulothethi( Wheelchairs) gore bophelo bja bona bo fetoge e be bjo bokaone.